Fransada ailə böhranı: maddi çətinliklər ailələrin uşaq planlarını dəyişir
Fransada valideynlərin 67 faizi daha bir uşaq sahibi olmaq üçün kifayət qədər maliyyə imkanına malik olmadığını bildirir.
NUHÇIXAN xəbər verir ki, bu nəticə Ailə Assosiasiyalarının Milli İttifaqının (Unaf) Ailələr Observatoriyasının “OpinionWay” şirkəti ilə 2 min 500 valideyn arasında keçirdiyi sorğuda əksini tapıb.
Maliyyə çətinlikləri xüsusilə gənc valideynlər və qadınlar arasında özünü göstərir. Hər iki qrupda respondentlərin 73 faizi əlavə uşağın ailəyə gəlməsi üçün kifayət qədər vəsaitlərinin olmadığını deyib. Kənd yerlərində bu göstərici 71 faiz təşkil edir.
Sorğuda iştirak edən valideynlərin 53 faizi uşaqlarının gələcəyini təmin etmək üçün kifayət qədər imkanlarının olmadığını düşünür. Bu göstərici 2024-cü ildə 43 faiz olub.
Sorğuda iştirak edənlərin 77 faizi gəlir səviyyəsindən asılı olmayaraq, uşaqlarla bağlı xərcləri yüksək hesab edir. Xüsusilə erkən uşaqlıq dövründə uşaq baxımı, yeniyetməlik dövründə isə digər xərclər ailə büdcəsinə ciddi təsir göstərir.
Valideynlərin yarıdan çoxu uşaq bağçalarını, məktəb yeməkxanalarını və asudə vaxt mərkəzlərini həddindən artıq bahalı hesab edir. Respondentlərin 78 faizi isə mövcud vergilər və dövlət yardımlarının uşaqların ailə büdcəsinə yaratdığı yükü kifayət qədər nəzərə almadığını düşünür.
Bu nəticələr Fransada doğum səviyyəsinin uzunmüddətli azalması fonunda açıqlanıb. 2025-ci ildə ölkədə 643 min 905 körpə doğulub. Bu, 2010-cu illə müqayisədə təxminən 190 min nəfər azdır.
Doğum səviyyəsinin azalması fonunda ailələrin maddi vəziyyəti Fransada qarşıdakı siyasi müzakirələrin əsas mövzularından birinə çevrilə bilər.