Finlandiya müdafiə naziri İsrail silahlarına üstünlük verdiyini bildirib

Finlandiya müdafiə naziri Antti Hakkanen bazar ertəsi günü bildirib ki, Helsinki İsraillə uzunmüddətli müdafiə əməkdaşlığını davam etdirməlidir.

NUHÇIXAN xarici mediaya istinadla xəbər verir ki, Müdafiə Nazirliyinin açıqlamasında Hakkanen son illərdə əldə edilən İsrail silah sistemlərinin Finlandiyanın müdafiə qabiliyyətinin əsasını təşkil etdiyini bildirib. O, “David's Sling” hava hücumundan müdafiə sistemi, “Gabriel 5” raketləri və “Spike” tank əleyhinə raketləri yüksək qiymətləndirib.

Nazirin bəyanatı İsrail ilə hərbi əlaqələrlə bağlı Avropada daha geniş müzakirələr fonunda səslənib. İnsan haqları qrupları hökumətləri İsrailə silah transferini dayandırmağa çağırıb və davamlı təchizatın Qəzzada beynəlxalq hüququn pozulmasına səbəb ola biləcəyi barədə xəbərdarlıq ediblər. İspaniya İsraillə silah ticarətinə məhdudiyyətləri sərtləşdirib, İtaliya isə bu ilin əvvəlində müdafiə əməkdaşlığı müqaviləsinin avtomatik yenilənməsini dayandırıb.

Hakkanen isə bildirib ki, sistemlərin alınması, həmçinin ehtiyat hissələri, proqram təminatı yeniləmələri, təlim və texniki dəstək üçün İsrail təchizatçıları ilə uzunmüddətli münasibətləri də nəzərdə tutur. “Bu fakt bizi istəsək də, istəməsək də İsraillə əməkdaşlığa bağlayır”, - deyə o qeyd edib.

Nazir əlavə edib ki, Finlandiyanın 2024-cü ilin müdafiə hesabatında İsrail ABŞ və Cənubi Koreya ilə yanaşı əsas hərbi texnologiya tərəfdaşı kimi qeyd olunub. Onun sözlərinə görə, Finlandiyanın parlament partiyalarından təkcə Solçu Alyans İsraillə hərbi əməkdaşlığa qarşı çıxıb.