Yunanıstan qida tullantılarının həcminə görə Aİ-də üçüncü yerdədir

Yunanıstanda adambaşına düşən qida tullantılarının həcmi Avropa İttifaqının (Aİ) orta göstəricisini xeyli üstələyib və ölkə bu göstəriciyə görə adıçəkilən qurumda üçüncü yerdə qərarlaşıb.

NUHÇIXAN xəbər verir ki, 2024-cü ildə Aİ-də adambaşına orta hesabla 129 kiloqram qida tullantısı yaranıb. İttifaq üzrə ümumi həcm 57,9 milyon tona çatıb ki, bu da 2023-cü ildə qeydə alınmış 57,5 milyon tonla müqayisədə 0,7 faiz çoxdur.

Aİ üzrə qida tullantılarının 53 faizi ev təsərrüfatlarının payına düşüb. Bu, adambaşına 69 kiloqrama bərabərdir. Restoranlar və ictimai iaşə xidmətlərinin payı 12 faiz və ya adambaşına 15 kiloqram təşkil edib.

Qalan 35 faiz qida təchizatı zəncirinin daha erkən mərhələlərində yaranıb. Qida və içkilərin istehsalı ümumi tullantıların 19, ilkin istehsal, pərakəndə satış və digər paylama mərhələlərinin hər biri isə 8 faizini təşkil edib.

Yunanıstanda vəziyyət Aİ ortalamasından əhəmiyyətli dərəcədə fərqlənir. Ölkədə 2024-cü ildə adambaşına 208 kiloqram qida tullantısı qeydə alınıb. Ümumi həcm 2 milyon 159 min 56 tona çatıb.

Yunanıstanda ən böyük pay ev təsərrüfatlarının üzərinə düşüb. Ev təsərrüfatları 907 min 454 ton qida tullantısı yaradıb ki, bu da ölkədəki ümumi həcmin təxminən 42 faizinə bərabərdir. Qida emalı və istehsalı sektorunda 555 min 723, restoran və ictimai iaşə sahəsində 259 min 581, ilkin istehsalda 244 min 859, pərakəndə satış və paylama sahəsində isə 191 min 439 ton tullantı qeydə alınıb.