Fransada 2027-ci il üzrə büdcə müzakirələri: hökumət 5 faizlik kəsir həddini qorumağa çalışır

Fransanın iqtisadiyyat naziri Rolan Lekür 2027-ci il dövlət büdcəsinin qəbulunda parlament müzakirələrinə üstünlük verdiyini və dövlət büdcəsi kəsirinin ÜDM-in 5 faizindən çox olmamasını hədəflədiyini bildirib.

NUHÇIXAN xəbər verir ki, nazir “France Inter” və “France 2” telekanallarına müsahibəsində büdcənin parlamentdə müzakirə edilməsinin vacibliyini vurğulayaraq, xüsusi fərman mexanizmlərindən istifadə etməməyə üstünlük verdiyini deyib. Büdcə layihəsinin müzakirəsi çərşənbə axşamı Milli Assambleyada başlayacaq.

Lekür bildirib ki, parlament büdcə kəsirini azaltmağa yönəlmiş təkliflər irəli sürərsə, hökumət onları nəzərdən keçirməyə hazırdır. Bununla belə, kəsirin ÜDM-in 5 faizini keçməyəcəyini vurğulayıb.

Nazir büdcənin qəbulunun üç mümkün yolunu qeyd edib: parlamentdə səsvermə, Konstitusiyanın 49.3-cü maddəsinin tətbiqi və fərmanlardan istifadə. Onun sözlərinə görə, fərmanlar parlamentdə çıxılmaz vəziyyət yaranacağı təqdirdə son vasitə kimi nəzərdə tutulur.

2027-ci il Sosial Təminat büdcəsi layihəsində bəzi əcnəbilərin mənzil və ailə müavinətləri kimi sosial yardımlardan yararlanması üçün birillik gözləmə müddətinin tətbiqi də nəzərdə tutulur. Bu təklif sağçı Respublikaçılarla aparılan müzakirələr nəticəsində hazırlanıb. Nazir tədbirin ifrat sağçı Milli Birlik (RN) partiyasına güzəşt olduğunu təkzib edib.

Lekür sözügedən müddəaya münasibətdə müəyyən narahatlığını etiraf etsə də, bütövlükdə büdcə layihəsini dəstəklədiyini və onu müxtəlif siyasi mövqelər arasında kompromis sənədi hesab etdiyini bildirib.

Büdcə layihəsinin parlamentdə müzakirəsi zamanı təklif olunan tədbirlərin dəyişdirilməsi mümkün olacaq. Hökumət isə əsas hədəfini - büdcə kəsirini ÜDM-in 5 faizi səviyyəsində saxlamaq niyyətindədir.