Oxfam Fransanı məhkəməyə verməyə hazırlaşır

Fransanın Oxfam təşkilatı vergi sistemində bərabərsizliyə yol verildiyini əsas gətirərək dövlətə qarşı inzibati qaydada müraciət edib. Təşkilat dövlətin ədalətli və bərabər vergi tutulmasını təmin etmək öhdəliyini yerinə yetirmədiyini bildirir.

NUHÇIXAN xəbər verir ki, France Inter və France Culture radiostansiyalarının məlumatına görə, “Oxfam France”ın icraçı direktoru Sesil Düflon milyarderlərin gəlirlərinə nisbətdə tibb bacılarından daha az vergi ödəməsini Fransanın respublika prinsiplərinə zidd hal kimi qiymətləndirib.

Təşkilat dövlətin vergi qarşısında bərabərliyi təmin etməməsini, vergidən yayınma ilə mübarizədə yetərli tədbirlər görməməsini və vergi siyasətinin nəticələrini qiymətləndirməməsini tənqid edir. İki ay ərzində cavab verilməzsə, Oxfam Paris İnzibati Məhkəməsinə müraciət etməyi planlaşdırır.

Oxfam ultra varlıların sərvətinə 2 faizlik vergi tətbiq edilməsini, əlavə mənfəətin və vergi cənnətlərinə köçürülən gəlirlərin vergiyə cəlb olunmasını, həmçinin kapital gəlirlərinə tətbiq edilən sabit verginin daha mütərəqqi sistemlə əvəzlənməsini təklif edir.

Təşkilat bu təşəbbüslə 2027-ci il prezident seçkilərində iştirak edəcək namizədlərin vergi ədaləti məsələsinə münasibət bildirməsinə nail olmağa çalışır. Oxfam kampaniyanı ölkə üzrə onlayn petisiya ilə dəstəkləməyi planlaşdırır.