Yunanıstanda süni intellektin inkişafı üçün ilk milli superkompüter istifadəyə verilib
Yunanıstanda süni intellekt texnologiyalarının inkişafı və elmi tədqiqatların aparılması üçün nəzərdə tutulan ilk milli superkompüter istifadəyə verilib.
NUHÇIXAN xəbər verir ki, Yunanıstanın “Kathimerini” qəzetinin məlumatına görə, “Daedalus” adlanan superkompüterin rəsmi açılış mərasimində ölkənin Baş naziri Kiriakos Mitsotakis iştirak edib.
Ümumi dəyəri 58,9 milyon avro olan layihə ölkənin yüksək məhsuldarlıqlı hesablama imkanlarının genişləndirilməsinə xidmət edir. Superkompüter süni intellekt modellərinin hazırlanması, böyük həcmli məlumatların emalı və mürəkkəb elmi hesablamaların həyata keçirilməsi üçün nəzərdə tutulub.
Layihə Yunanıstanın rəqəmsal infrastrukturunun gücləndirilməsinə, elmi-tədqiqat müəssisələrinin texnoloji imkanlarının artırılmasına və innovasiya ekosisteminin inkişafına töhfə verəcək.