Britaniyada internet kəsintisi ciddi problemlərə səbəb olub

Böyük Britaniyada baş verən genişmiqyaslı internet kəsintisi nəticəsində “Revolut” onlayn bankçılıq tətbiqinin və bir sıra iri şirkətlərin internet xidmətlərində ciddi problemlər yaranıb.

NUHÇIXAN “The Independent”ə istinadla xəbər verir ki, texniki nasazlıq “Revolut” ilə yanaşı, daşınmaz əmlak platforması “Rightmove” və çatdırılma şirkəti DPD-nin də xidmətlərinə təsir göstərib.

İlkin məlumatlara görə, problemin ən azı qismən “Google Cloud” bulud xidmətində yaranan texniki nasazlıqla əlaqəli olduğu ehtimal edilir. Sözügedən platforma çoxsaylı şirkət və internet saytlarının fəaliyyətini təmin edən rəqəmsal infrastruktura xidmət göstərir.

Kəsinti xüsusilə “Revolut” istifadəçiləri üçün ciddi çətinliklər yaradıb. Müştərilər mobil tətbiqə daxil ola bilməməklə yanaşı, mağazalarda bank kartları vasitəsilə ödəniş etməkdə də problemlərlə üzləşiblər. Xidmətlərin nə vaxt tam bərpa olunacağı barədə hələlik məlumat verilməyib.