Marko Rubio: ABŞ, Rusiya və Çin liderlərinin sammiti dünya üçün çox müsbət hadisə olardı
ABŞ dövlət katibi Marko Rubio çərşənbə axşamı bildirib ki, ABŞ, Rusiya və Çin liderlərinin iştirakı ilə keçirilə biləcək sammit dünya üçün çox müsbət hadisə olardı.
NUHÇIXAN “Reuters” agentliyinə istinadla xəbər verir ki, Hindistanda jurnalistlərə açıqlama verən Rubio deyib: “Düşünürəm ki, belə bir imkan mövcuddur. Prezident (Donald Tramp) ABŞ, Rusiya və Çin liderləri səviyyəsində görüş keçirməyə və silahlanmaya nəzarət kimi məsələləri müzakirə etməyə açıq olduğunu ifadə edib”.
O, dünyanın ən güclü üç nüvə dövləti arasında ünsiyyətin olmasının qeyri-adi bir hal olmadığını vurğulayıb.
Rubio diplomatik təmasların bir növ “sensasiya” kimi qəbul edilməsi fikrini rədd edərək bildirib ki, Tramp digər ölkələrlə danışıqlar aparmağı güzəşt hesab etmir. O, qarşı tərəflə ünsiyyət qura bilməyi diplomatiya və danışıqların təməl şərti kimi xarakterizə edib.
Üç ölkə arasındakı uzunmüddətli fikir ayrılıqlarının bir sammitlə aradan qalxmayacağını etiraf edən Rubio bildirib ki, buna baxmayaraq, əlaqə saxlamaq vacibdir. “Düşünürəm ki, dünyanın ən güclü nüvə arsenalına malik ölkələrin liderləri heç olmasa bir-biri ilə ünsiyyətdə olduqda, dünya daha təhlükəsiz bir yerə çevrilir”, - deyə o bildirib.
Rubio qeyd edib ki, Pekin tarixən öz nüvə arsenalını digər böyük dövlətlərin səviyyəsinə çatdırana qədər silahlanmaya nəzarət mövzusunda müzakirələrdən yayınıb. Bununla belə, o, ABŞ-də cəhd etməyə hazır olan bir Prezidentin olmasını müsbət hal kimi qiymətləndirib.
Onun bu şərhləri Trampın bazar ertəsi Rusiya Prezidenti Vladimir Putin və Çinin Sədri Si Cinpin ilə üçtərəfli danışıqlar aparmağa açıq olduğunu bildirməsindən sonra səslənib. ABŞ Prezidenti bildirib ki, danışıqların əsas mövzusu nüvə tərk-silahı olacaq.
Bu təklif “The Wall Street Journal” qəzetinin bazar günü yaydığı məlumatdan sonra ortaya çıxıb. Həmin məlumata görə, Putin Ukraynadakı müharibəyə son qoyulması məsələsini müzakirə etmək üçün gələn ay üçtərəfli görüş keçirilməsini təklif edib.
Kremlin sözçüsü Dmitri Peskov danışıqların davam etdiyini təsdiqləyib və hələlik razılaşdırılmış bir gündəliyin olmamasına baxmayaraq, belə bir görüşün nəzəri cəhətdən mümkünlüyünü etiraf edib.