Seul Şimali Koreyanı sərhəd toqquşmalarının qarşısını almaq üçün əlaqə kanalları yaratmağa çağırır
Cənubi Koreya sərhəddə baş verə biləcək təsadüfi toqquşmaların qarşısını almaq məqsədilə Şimali Koreyanı əlaqə kanalları yaratmağa çağırıb.
NUHÇIXAN xəbər verir ki, bu barədə Cənubi Koreyanın Milli Birlik Nazirliyinin yaydığı bəyanatda qeyd olunur. Bildirilir ki, iki ölkə arasında gərginlik və toqquşma riskinin qarşısını almağın əsas yolu hərbi demarkasiya xətti ilə bağlı baxışları uyğunlaşdırmaq və vəziyyətin sülh yolu ilə idarə olunması üçün operativ şəkildə əlaqə mexanizmi qurmaqdır. Nazirlik qeyd edib ki, tərəflər əvvəllər bir-birinə qarşı səsgücləndiricilər vasitəsilə yayımlar aparıb və bu, sərhəd bölgələrində yaşayan sakinlər üçün narahatlıq yaradıb. Qurum əlavə edib ki, keçmişdə buraxılmış bu cür səhvlər təkrarlanmamalıdır.
Şimali Koreyanın rəsmi xəbər agentliyinin (KCNA) məlumatına görə, bu bəyanat Koreya Əmək Partiyası Mərkəzi Komitəsinin şöbə müdiri Kim Yo Conqun açıqlamasına cavab olaraq verilib. Şimali Koreya lideri Kim Çen Inın bacısı Kim Yo Conq və bir hərbi marşal iki ölkə arasında sərhəd boyunca aparılan istehkam işlərini yoxlayıblar. Kim Yo Conq bildirib ki, Pxenyan bu ay sərhəd boyunca Seula qarşı psixoloji müharibə məqsədilə səsgücləndiricilərdən istifadə edəcək. Agentliyin xəbərinə görə, Kim Yo Conq Cənubi Koreyanın açdığı xəbərdarlıq atəşlərinin KXDR-in ərazi təhlükəsizliyinə və ya hərbi qulluqçularının təhlükəsizliyinə real zərər vurarsa, ölkə sərhədçilərinin heç bir mərhəmət göstərməyəcəkləri barədə xəbərdarlıq edib.
Bu yoxlama Pxenyanın sərhəd boyunca zərbə vasitələri yerləşdirmək təhdidindən sonra Cənubi Koreya ordusunun şimal tərəfindən daha çox təxribat törədiləcəyi təqdirdə qətiyyətli addımlar atacağını bəyan etməsindən sonra baş tutub.
Qeyd edək ki, Şimali Koreya lideri Kim Çen In ötən il iki Koreyanı bir-birinə düşmən olan iki dövlət elan etməsindən sonra 2024-cü ilin aprelindən etibarən Cənubi Koreya ilə sərhədini gücləndirməyə başlayıb. Bu çərçivədə hərbi demarkasiya xətti boyunca minalar döşənir, tikanlı məftillər çəkilir və tankəleyhinə maneələr quraşdırılır. Cənubi Koreya tərəfi iddia edir ki, aparılan istehkam işləri zamanı Şimali Koreya qoşunları dəfələrlə hərbi demarkasiya xəttinə yaxınlaşıb, hətta onu keçib. Bu isə Cənubi Koreya qüvvələrini xəbərdarlıq elanları səsləndirməyə və onları geri çəkilməyə məcbur etmək üçün xəbərdarlıq atəşi açmağa vadar edib. Ötən ay demilitarizasiya zonasında (DMZ) baş verən mina partlayışları nəticəsində Cənubi Koreyanın 3 əsgəri yaralanıb. Cənubi Koreya və BMT Komandanlığı hadisəni Şimali Koreya tərəfindən yerləşdirilən minalarla əlaqələndirir, lakin Şimali Koreya bu hadisədə iştirakını rədd edir.