KTMT-nin baş katibi Ermənistanın təşkilatdan de-fakto çıxdığını bildirib
Kollektiv Təhlükəsizlik Müqaviləsi Təşkilatının (KTMT) baş katibi Taatbek Masadıkovun sözlərinə görə, Ermənistan faktiki olaraq bu təşkilatdan çıxıb.
NUHÇIXAN xəbər verir ki, təşkilatın baş katibinin jurnalistlərə bildirdiyinə görə, İrəvan daxili təsdiq üçün üzv dövlətlərə göndərilən sənədləri almağa davam edir. Buna cavab olaraq, Ermənistan tərəfi müzakirələrdə və qərar qəbuletmədə iştirak etmədiyini, lakin onların məhdud formatda qəbul edilməsinə etirazı olmadığını bildirir.
O, Ermənistan nümayəndəsinin KTMT Daimi Şurasının həftəlik iclaslarında iştirak etdiyini və hesabatları dinlədiyini qeyd edib. Lakin respublika təşkilatın əsas tədbirlərində və təlimlərində iştirak etmir.
Baş katib, həmçinin Ermənistanın üzvlüyünün noyabrın 11-də Moskvada keçiriləcək KTMT Kollektiv Təhlükəsizlik Şurasının sessiyasında nəzərdən keçirilə biləcəyini istisna etməyib. O əlavə edib ki, sədrlik edən ölkə və ya təşkilatın digər üzv dövləti müvafiq təklif verərsə, bu mümkün ola bilər. T. Masadıkov mövcud vəziyyəti KTMT Nizamnaməsinin 25-ci maddəsi ilə əlaqələndirib. O, üzvlük haqqının ödənilməməsinin və kvota vəzifələrinin doldurulmamasının səsvermə hüquqlarının itirilməsinə səbəb ola biləcəyini izah edib.
Bir müddət əvvəl Ermənistanın Baş naziri Nikol Paşinyan parlamentdə çıxış edərək, respublikanın KTMT-dən çıxarılmasını dəstəklədiyini və bu baş verərsə, məmnun olacağını bildirmişdi. O, həmçinin qeyd edib ki, İrəvan növbəti beş il ərzində təşkilatın işində fəal iştirak etmək niyyətində deyil.
Ermənistan tərəfi əvvəllər KTMT-də iştirakını “dondurduğunu” elan etmişdi. 2024-cü ilin dekabrında Paşinyan bu ölkənin təşkilatla münasibətlərinin geri dönüş nöqtəsini keçdiyini bildirmişdi.