Britaniyanın Baş naziri: Dünyadakı qeyri-sabit vəziyyət planlarımızı həyata keçirməyə imkan vermədi

Böyük Britaniyanın Baş naziri Endi Börnhem rəhbərlik etdiyi hökumətin hakimiyyətə gəldikdən sonra hazırladığı ilk dövlət büdcəsinin əvvəlcədən planlaşdırıldığı qədər genişmiqyaslı dəyişiklikləri əhatə etmədiyini etiraf edib.

NUHÇIXAN xəbər verir ki, Baş nazir bu barədə vəzifəyə başlamasının ilk 100 günü münasibətilə ITV telekanalına müsahibəsində bildirib.

Endi Börnhem bildirib ki, dünyada hökm sürən qeyri-sabit vəziyyət onun və maliyyə naziri Con Hilinin daha radikal büdcə hazırlamaq imkanlarını məhdudlaşdırıb. Baş nazirin sözlərinə görə, hökumət daha genişmiqyaslı tədbirlər həyata keçirmək niyyətində olsa da, mövcud iqtisadi şərait buna imkan verməyib.

“Manevr imkanlarımız ümid etdiyim qədər geniş deyildi. Dünyadakı qeyri-sabitlik o deməkdir ki, ideal şəraitdə təqdim etmək istədiyiniz büdcəni hər zaman həyata keçirə bilmirsiniz”, - deyə o vurğulayıb.

Bununla belə, Endi Börnhem büdcədə əhalinin həyatına müsbət təsir göstərəcək mühüm tədbirlərin nəzərdə tutulduğunu qeyd edib. O, təxminən 20 il əvvəl dövlət tərəfindən maliyyə yardımı almış banklardan həmin dəstəyin əvəzini ödəmələrinin tələb olunmasını mühüm qərar adlandırıb. Baş nazir, həmçinin 20 milyon ev təsərrüfatına maliyyə ödənişlərinin ayrılmasını əhəmiyyətli addım kimi qiymətləndirib. Müsahibə zamanı Baş nazir növbədənkənar parlament seçkilərinin keçirilməsi ehtimalına da münasibət bildirib. Gələn ilin may ayında erkən seçkilərin təşkil oluna biləcəyi barədə ehtimallara baxmayaraq, o, belə bir planın olmadığını bir daha vurğulayıb: “Mən bunu təkzib etməyə davam edəcəyəm. Artıq bir neçə həftədir ki, mövqeyimi açıq şəkildə bildirirəm. Ümid edirəm ki, nəhayət, insanlar dediklərimə diqqət yetirəcəklər”.