ABŞ Rusiya qazının Ukrayna vasitəsilə Avropaya nəqlinin bərpasını təklif edir

ABŞ Ukrayna ərazisindən keçən boru kəmərləri vasitəsilə Rusiya təbii qazının Avropaya tədarükünün bərpasını dəstəkləyir.

NUHÇIXAN xəbər verir ki, bu barədə “The Wall Street Journal” qəzeti məlumatlı mənbələrə istinadla yazıb.

Nəşrin məlumatına görə, bu təşəbbüs ABŞ Prezidenti Donald Trampın xüsusi nümayəndəsi Stiv Uitkoff və kürəkəni Cared Kuşner tərəfindən irəli sürülüb. Təklifə əsasən, Rusiya qazının Avropaya satışı amerikalı vasitəçi şirkət üzərindən həyata keçirilə bilər.

Mənbələr bildiriblər ki, Vaşinqton Avropanın enerji xərclərini azaltmaq məqsədilə bu təklifi müzakirəyə çıxarıb. ABŞ tərəfi, həmçinin “Şimal axını” boru kəmərləri vasitəsilə qaz nəqlinin bərpası imkanlarını nəzərdən keçirir.

Nəşrin yazdığına görə, Vaşinqton bu təşəbbüsün Ukrayna böhranının nizamlanmasına və Rusiya ilə Avropa ölkələri arasında münasibətlərin yaxşılaşmasına töhfə verə biləcəyini düşünür.