Rusiya MDB ölkələri arasında borclular haqqında məlumat mübadiləsinə dair sazişi ratifikasiya edib

Rusiya Prezidenti Vladimir Putin MDB ölkələri arasında məhkəmə qərarlarının və digər səlahiyyətli orqanların aktlarının məcburi icrası zamanı məlumat mübadiləsini nəzərdə tutan sazişin ratifikasiyası haqqında qanunu imzalayıb.

NUHÇIXAN xəbər verir ki, müvafiq sənəd Rusiyanın rəsmi hüquqi informasiya portalında dərc olunub.

Ötən il imzalanmış saziş MDB ölkələrinin səlahiyyətli orqanları arasında məhkəmə qərarlarının icrası üçün zəruri məlumatların mübadiləsini nəzərdə tutur. Söhbət, xüsusilə də, borcluların iş yeri və əmlak vəziyyəti, onların mülkiyyətində olan daşınmaz əmlak və nəqliyyat vasitələri, bank hesabları, kommersiya təşkilatlarındakı payları və digər aktivləri barədə məlumatlardan gedir.

Sazişi səkkiz dövlət – Azərbaycan, Ermənistan, Belarus, Qazaxıstan, Qırğızıstan, Rusiya, Tacikistan və Özbəkistan imzalayıb.