UNICEF Ukrayna və Myanmada uşaqların təhsili və təhlükəsizliyinə artan təhdidlər barədə xəbərdarlıq edir
UNICEF çərşənbə axşamı xəbərdarlıq edib ki, Ukraynadakı uşaqlar hava hücumları nəticəsində təhsillərində getdikcə daha çox pozuntularla üzləşirlər, Myanmada baş verən münaqişə isə məktəblərdə və səhiyyə müəssisələrində uşaqların ölümünə və yaralanmasına səbəb olub.
NUHÇIXAN BMT-nin məlumatına istinadla xəbər verir ki, UNICEF-in sözçüsü Rikardo Pires Cenevrədə jurnalistlərə bildirib: “Ukraynalı uşaqlar 2026-2027-ci tədris ilinin əvvəlindən bəri məktəb saatlarında orta hesabla 34 saat hava hücumu həyəcanı ilə qarşılaşıblar ki, bu da planlaşdırılan tədris vaxtının 13 faizindən çoxuna bərabərdir”.
Sentyabr və oktyabr aylarında dərs günlərinin təxminən üçdə ikisində hava hücumu ilə bağlı həyəcan siqnalları elan olunub, ötən ilin eyni dövründə isə bu rəqəm təxminən üçdəbir olub.
Dnepropetrovsk və Xarkov vilayətlərində 560 mindən artıq uşaq 60 saatdan çox məktəb vaxtı hava hücumu həyəcanı siqnalları ilə qarşılaşıb ki, bu da planlaşdırılan tədris saatlarının təxminən dörddəbirini təşkil edir.
BMT, həmçinin Ukraynada təhsil müəssisələrinə təxminən 2000 hücumu təsdiqləyib, o cümlədən bu il təxminən 270 hücum baş verib.
“Uşaqlar hücumlardan qorunmalıdır və hər bir azyaşlının təhlükəsiz şəkildə təhsil almaq hüququ var”, - deyə Pires bildirib. O, həmçinin bütöv bir nəslin təhsildən qalma riski ilə bağlı xəbərdarlıq edib.
Myanmaya toxunan Pires oktyabrın 31-də Kayah əyalətinin Loikav qəsəbəsindəki məcburi köçkün ailələrinə xidmət göstərən bir məktəbə hava hücumunun üç uşağın ölümünə və beş uşağın yaralanmasına səbəb olması ilə bağlı xəbərlərdən narahatlığını bildirib.
Həftəsonu Raxayn əyalətində baş verən digər hava hücumlarına yeni doğulmuş körpənin və səhiyyə işçilərinin ölümü ilə nəticələnən müvəqqəti səhiyyə müəssisəsinə edilən hücum da daxil idi.
UNICEF bütün tərəfləri beynəlxalq humanitar hüquqa uyğun olaraq uşaqları qorumağa çağırıb.