Fransa bankına kiberhücum: 133 milyon dollardan çox vəsaitin mənimsənildiyi bildirilir

Fransanın “Crédit Mutuel Arkéa” bank qrupu noyabrın 4-də kibertəhlükəsizlik hücumuna məruz qaldığını və bunun nəticəsində saxta maliyyə əməliyyatlarının həyata keçirildiyini təsdiqləyib.

NUHÇIXAN  xəbər verir ki, “BFM Business”in məlumatına görə, ZachXBT kriptovalyuta əməliyyatları üzrə ixtisaslaşmış araşdırmaçı mənimsənildiyi ehtimal olunan vəsaitin 133 milyon dolları keçdiyini bildirir. Bank isə bu məbləği təsdiqləməyib.

Bretan bölgəsində yerləşən bank qrupu insidentin nəzarət altına alındığını və müştərilər üçün heç bir maliyyə itkisinə səbəb olmadığını açıqlayıb. Hücum aşkar edildikdən dərhal sonra mütəxəssislər müdaxilə edib, yeni saxta əməliyyatların qarşısını almaq üçün bəzi köçürmələr müvəqqəti dayandırılıb.

ZachXBT-nin “BFM Business” tərəfindən yayımlanan məlumatlarına əsasən, hücum bir neçə gün davam edib. Vəsaitlər əvvəlcə kriptovalyuta mübadilə platformalarına köçürülüb, daha sonra isə dəyəri adətən ABŞ dolları kimi ənənəvi valyutaya indeksləşdirilən stabilkoinlərə çevrilib.

Araşdırmaçı hesab edir ki, hadisə barədə səlahiyyətli orqanlara daha tez məlumat verilsəydi, bəzi köçürmələri dondurmaq və vəsaitlərin bir hissəsinin yuyulmasının qarşısını almaq mümkün ola bilərdi.