Almaniyanın ətraf mühit naziri dünyada “enerji inqilabı”nın baş verdiyini bildirib

Almaniyanın ətraf mühit naziri Karsten Şnayder deyib ki, bərpaolunan enerji mənbələrinin inkişafı sayəsində dünya hazırda “enerji inqilabı” yaşayır.

NUHÇIXAN xəbər verir ki, nazir bu mənbələrin enerji təchizatını daha əlçatan və müstəqil etdiyini bildirib.

“Bərpaolunan enerji mənbələri sayəsində əvvəllər buna imkanı olmayan bir çox ölkə indi öz enerji təchizatı sistemini sürətlə, az xərclə və mərkəzləşdirilməmiş qaydada qura bilir”, – deyə Şnayder “Funke” media qrupuna müsahibəsində bildirib. O, dünyada hazırda enerji inqilabının ən qızğın mərhələsinin yaşandığını vurğulayıb.

Nazirin sözlərinə görə, bu prosesi enerji sektorunun bir növ demokratikləşməsi adlandırmaq olar.

“Bu gün atom elektrik stansiyasının tikintisi 20 milyard avroya başa gəlir və 20 il vaxt aparır. Böyük günəş elektrik stansiyasını isə bir ildən az müddətə və bu məbləğin cüzi bir hissəsinə tikmək mümkündür”, – deyə nazir əlavə edib.

Şnayder Antalyada keçirilən BMT-nin İqlim Dəyişmələri üzrə Çərçivə Konvensiyasının Tərəflər Konfransının 31-ci sessiyasında (COP31) Türkiyə sədrliyinin irəli sürdüyü təşəbbüsü dəstəklədiyini bildirib. Proqramın məqsədi son enerji istehlakında elektrik enerjisinin qlobal payını hazırkı 20 faizdən 2035-ci ilədək 35 faizə çatdırmaqdır. Avtomobil nəqliyyatının, sənaye müəssisələrinin və iqtisadiyyatın digər sektorlarının elektrik enerjisi ilə işləyən sistemlərə keçirilməsi forum iştirakçıları tərəfindən fosil yanacaqlardan imtinanın əsas şərti kimi qiymətləndirilir.

Nazirin qiymətləndirməsinə görə, elektrik avtomobilləri və istilik nasosları yüksək enerji səmərəliliyi sayəsində artıq indidən iqlimin qorunmasına töhfə verir, enerji balansında bərpaolunan enerji mənbələrinin payının artması isə bu təsiri daha da gücləndirir. Nazir ötən il dünyada istismara verilən bütün yeni elektrik enerjisi istehsalı güclərinin 85 faizindən çoxunun məhz bərpaolunan enerji mənbələrinin payına düşdüyünü göstərən məlumatları da diqqətə çatdırıb.