Misir “Christies” satış evindən Tutanxamonun büstünü hərraca qoymamağı tələb edib

Misir hakimiyyəti “Christie's” satış evindən Tutanxamonun büstünü hərracdan çıxarmağı tələb edib.

NUHÇIXAN BBC telekanalına istinadla xəbər verir ki, Misir Xarici İşlər Nazirliyinin iddiasına görə, 3 min il yaşı olan büst 1970-ci illərdə ölkədəki məbədlərdən birindən oğurlanıb. Qədim abidə hazırda fərdi kolleksiyada saxlanılır.

Misirli ekspertlərin fikrincə, büst 1970-ci ildən sonra, digər artefaktların Karnak məbədindən oğurlandığı zaman ölkədən çıxarılıb.

Satış evinin nümayəndələri lotun əvvəllər də ictimaiyyət qarşısına çıxarıldığını, lakin o vaxt Qahirənin heç bir etiraz irəli sürmədiyini qeyd edib.

Kvarsitdən hazırlanan 28 santimetrlik büst iyulun 4-də hərraca çıxarılacaq. Onun 5 milyon dollardan da yüksək qiymətə satılacağı gözlənilir.

Tutanxamonun sərdabəsi 1922-ci ildə britaniyalı arxeoloqlar tərəfindən aşkarlanıb. Sərdabənin alimlərə qədər açılmaması faktı ona və firona məşhurluq qazandırıb.

Qeyd edək ki, 1983-cü ildə Misirdə qədim əşyaların xaricə çıxarılması qadağan edilib.