Yerevanda hərbçilərin meyitlərinin təhqirinə narazılıq edənlər saxlanılıb
NUHÇIXAN İnformasiya Agentliyi Ermənistan mətbuatına istinadən xəbər verir ki, Ermənistan polisinin əməkdaşları ölkənin paytaxtı Yerevanda Səhiyyə Nazirliyinin binası qarşısında keçirilən etiraz aksiyasının iştirakçılarını saxlayıb.
Məlumata görə, aksiya zamanı etirazçılarla polis əməkdaşları arasında qarşıdurma olub. Aksiyaçılar nazirliyin binasına polietilen paketlər atmağa başlayıblar.
Qeyd edək ki, aksiya iştirakçıları Ermənistanın səhiyyə naziri səlahiyyətlərini müvəqqəti icra edən Anait Avanesyanın istefasını tələb edirlər. Buna səbəb mətbuatda ikinci Qarabağ müharibəsində məhv edilmiş erməni hərbi qulluqçuların meyitlərinin Abovyan şəhərinin vərəm xəstəxanasının meyitxanasının döşəməsinə atılmasını əks etdirən foto və videogörüntülərin yayılmasıdır.