Türkiyəli nazir: Mərmərə dənizində selik təbəqəsinin yaranmasının üç əsas səbəbi var
Türkiyənin ətraf mühit və şəhərsalma naziri Murat Kurum ölkənin Mərmərə dənizində hər gün artan selik təbəqəsi ilə bağlı açıqlama verib.
NUHÇIXAN İnformasiya Agentliyi xəbər verir ki, nazir bununla bağlı aidiyyəti qurumlar, o cümlədən Mərmərə bölgəsinə daxil bütün bələdiyyələrlə birlikdə təcili hərəkət planının hazırlandığını söyləyib. Bu selik təbəqəsinin yaranmasının əsas üç səbəbi olduğunu vurğulayan nazir deyib: “5 İyun - Dünya Ətraf Mühit Günüdür və məhz bu tarixdə dövlət başçımızın iştirakı ilə İstanbulda ölkəmizin yeddi bölgəsindəki çox əhəmiyyətli ekoloji sərmayələri ictimaiyyətlə paylaşacağıq. Bazar günü isə Mərmərə dənizində yaranan selik təbəqəsi ilə bağlı araşdırmanın nəticələri açıqlanacaq. İlkin araşdırmalara əsasən, bunun üç əsas səbəbi var. Bunlar dəniz suyunun temperaturunun artması, dənizdəki çirklənmə və iqlim dəyişikliyinin təsiri ilə dənizlərdə suyun səviyyəsinin azalmasıdır”.