Türkiyədə yeni silahın sınaqları uğurlu olub - VİDEO
Türkiyədə yerli istehsal dəniz topunun sınaq atışı uğurla həyata keçirilib.
NUHÇIXAN İnformasiya Agentliyinin məlumatına görə, tədbirdə ölkənin müdafiə naziri Hulusi Akar, həmçinin Baş Qərargah rəisi və ordu komandanları iştirak edib.
Türkiyə prezidenti Rəcəb Tayyib Ərdoğan da Karapınardakı atıcılıq poliqonunda keçirilən sınaqların iştirakçılarına videomüraciət ünvanlayıb. Dövlət başçısı yeni 76/62 millimetrlik dəniz topunun Türkiyə Silahlı Qüvvələri üçün xeyirli olmasını diləyib.
Nazir Akar isə çıxışında ölkə ordusunun təchizatında yerli istehsal payının artıq 80%-ə çatdığını bildirib.
Tədbirdə yeni silahın 16 km-dək effektli atəş məsafəsinə, 5 atəş rejiminə malik olması və dəqiqədə 80 atış həyata keçirdiyi vurğulanıb.
Dəniz topunun tezliklə Türkiyə Silahlı Qüvvələrinin arsenalına daxil olunacağı qeyd edilib.