Beynəlxalq Kosmik Stansiyaya ilk turistlərin uçacağı tarix açıqlanıb

Amerikanın Axiom şirkətinin proqramı üzrə Beynəlxalq Kosmik Stansiyaya (BKS) ilk turistlər 2022-ci ilin fevral ayının sonunda SpaceX-in Crew Dragon idarə olunan kosmik gəmisi ilə uçacaqlar.

NUHÇIXAN İnformasiya Agentliyi xəbər verir ki, bu barədə ABŞ-ın Kosmik agentliyi (NASA) məlumat yayıb.

İdarə olunan kosmik uçuşlar üzrə rəhbər Keti Luders bildirib ki, uçuş 28 fevrala planlaşdırılıb.

Turistik uçuşu Amerikanın Axiom Space şirkəti təşkil edir. Daha əvvəl şirkət bildirmişdi ki, kosmik gəminin ekipajına ​​keçmiş NASA astronavtı Maykl Lopez-Aleqria, pilotun işini yerinə yetirəcək amerikalı sahibkar Larri Konnor, kanadalı investor Mark Pati və israilli iş adamı Eitan Stibbe daxildir. Onların hamısı xüsusi həkim müayinəsindən və uçuşa hazırlıq keçiblər.

BKS-ə 8 günlük səfərin dəyəri 55 milyon dollar qiymətləndirilir. Axiom Space proqramı çərçivəsində kosmos turistləri ilə uçuşların gələcəkdə ildə 2-3 dəfə həyata keçirilməsi planlaşdırılır.