ABŞ-da ilk Türkiyə istehsalı elektromobilin təqdimatı olub

ABŞ-ın Las-Veqas şəhərində keçirilən dünyanın ən böyük elektronika sərgisi CES 2022-də (Consumer Technology Association) ilk Türkiyə istehsalı elektrik avtomobil Togg-un təqdimatı keçirilib.

NUHÇIXAN İnformasiya Agentliyi xəbər verir ki, TOGG şirkətinin rəhbərliyinin bəyanatında bildirilir ki, ilk Türk elektrikli avtomobilinin konsepti 100 faiz türk əqli və sənaye mülkiyyətinə sahib qlobal marka yaratmaq məqsədilə həyata keçirilib.

"Biz özümüzü texnologiya şirkəti kimi görürük. Buna görə də biz ən son innovasiyaların və qabaqcıl texnologiyanın nümayişi olan CES-dəyik", - deyə TOGG-un icraçı direktoru Gürcan Qaraqaş bildirib.

CES 2022 Elektronika Sərgisi 5-7 yanvar tarixlərində Las-Veqasda keçirilir.

Türkiyədə ilk yerli avtomobillərin - elektrik krossover SUV C seqmentinin və elektrik sedanın prototipləri 2019-cu ilin dekabrında təqdim edilib.

2021-ci il noyabrın əvvəlində İstanbulda SUV seqmentinin TOGG elektrik krossover prototipinin müxtəlif sistemləri sınaqdan keçirildi. Dörd sərnişinlə elektromobil 0-dan 100 km/saata 4,8 saniyəyə sürətlənib.