Türkiyə və Rusiya prezidentləri arasında telefon danışığı olub
Aprelin 1-də Türkiyə Prezidenti Rəcəb Tayyib Ərdoğan ilə Rusiya Prezidenti Vladimir Putin arasında telefon danışığı olub.
NUHÇIXAN İnformasiya Agentliyi xəbər verir ki, bu barədə Türkiyə Prezidenti Administrasiyasının Kommunikasiya İdarəsi məlumat yayıb.
Bildirilib ki, danışıq əsnasında Rusiya və Ukraynanın nümayəndə heyətlərinin İstanbul görüşlərinin nəticələri müzakirə edilib.
Prezident Ərdoğan Rusiya və Ukraynanın nümayəndə heyətlərinin İstanbulda müsbət və konstruktiv görüşünün sülhə olan ümidləri artırdığını bildirib.
Tərəflərin sağlam düşüncə ilə hərəkət etməsinin və dialoqun davam etdirilməsinin vacib olduğunu deyən Türkiyə Prezidenti Rusiya və Ukrayna dövlət başçılarını bir araya gətirərək sülh səylərini taclandırmaq istədiklərini dilə gətirib.
Prezident Vladimir Putin öz növbəsində Rusiya və Ukraynanın nümayəndə heyətlərinin İstanbulda keçirilən görüşünə ev sahibliyi etdiyi üçün Prezident Rəcəb Tayyib Ərdoğana təşəkkürünü bildirib.