Ukrayna ordusu Sumı əyalətini azad edib
Ukraynanın Sumı Vilayət Dövlət Administrasiyasının rəhbəri Dmitri Jiviski bildirib ki, bölgə rus işğalçılarından tamamilə azad edilib, lakin hələ də minalardan təmizlənməyə ehtiyac var.
Bu barədə NUHÇIXAN İnformasiya Agentliyi Jiviskinin feysbuk hesabındakı açıqlamasına istinadən xəbər verir.
"Vilayətin ərazisi işğalçılardan azaddır, buna görə də partlayış səsləri eşidirsinizsə (son günlər çox olub), bilin ki, xilasedicilər və partlayıcı qurğular işləyir. Onlar torpaqlarımızda rusiyalı hərbçilərdən qalan sursatları zərərsizləşdirirlər”, - Sumı Regional Dövlət Administrasiyasının rəhbəri yazıb.
Eyni zamanda Jiviski ukraynalılara xəbərdarlıq edib ki, ərazi hələ də təhlükəlidir. Rusiya hərbçiləri hələ yoxlanılmamış çoxlu minalanmış əraziləri qoyub gediblər.
O, meşə yollarından istifadə etməməyi məsləhət görüb. “Dağıdılmış texnikaya və ya işğalçıların dayanacaq kimi istifadə etdiyi yerlərə yaxınlaşmayın! Mən bilirəm ki, orada hər şey dəhşətlidir, amma hələ təmizləmə vaxtı deyil. Əvvəlcə minalardan təmizlənilmə işləri aparılmalıdır”, - Jiviski əlavə edib.
Sumı Regional Dövlət Administrasiyasının aprelin 4-də bildirib ki, Rusiya qoşunları Ukraynanın Sumı vilayətini tərk edir. Dmitri Jiviski Rusiya qoşunlarının bölgə ərazisindən fəal şəkildə çıxarıldığını vurğulayıb.
"Sumı vilayətindən şad xəbərimiz var. Dünəndən etibarən Rusiya qoşunları bölgəmizdən fəal şəkildə öz ərazilərinə getməyə başlayıblar. Son günlər biz Rusiya qoşunlarının Belopolyedən Konotopun özünə qədər cəmləşməsini müşahidə etdik. Yeni hərbi karvanlar daxil olub, onlar vilayətdə, icmalarda terrorla məşğul olublar, dinc əhaliyə atəş açıblar, meşələri, evləri, küçələri tanklardan, qumbaraatanlardan atəşə tutublar”, - Jiviski deyib.