Fransa Ukraynaya müxtəlif silahlar verib

Fransa Ukraynaya “Milan” tank əleyhinə raketləri və “Sezar” topları da daxil olmaqla, müxtəlif növ silahlarla yardım edib.

NUHÇIXAN İnformasiya Agentliyi xəbər verir ki, bu barədə Fransa Prezidenti Emmanuel Makron “Ouest France” portalına müsahibəsində bildirib. Fransa Prezidenti ilk dəfə ölkənin silah tədarükü haqqında ətraflı məlumat verib. Onun sözlərinə görə, Fransa əhəmiyyətli avadanlıqlarla və bir neçə növ silahla rəsmi Kiyevə kömək edib. “Bu yol davam etdirilməlidir. Birgə döyüşə girməmək üçün həmişə qırmızı xətt nəzər alınıb”, - deyə Fransa Prezidenti vurğulayıb.

“Milan” tank əleyhinə raketlərinin və “Sezar” toplarının dəqiq sayı açıqlanmayıb. Fransa mətbuatının məlumatına əsasən “Milan” raketləri artıq Ukraynaya verilib. “Le Monde” qəzeti isə “Sezar” toplarının, eləcə də minlərlə mərminin yaxın günlərdə Ukraynaya çatdırılacağını bildirib. O da vurğulanıb ki, 40-a qədər ukraynalı hərbçi şənbə günündən etibarən Fransada təlim keçəcək.