İstanbulda bir gəmidə karbon qazı sızması nəticəsində dörd işçi zəhərlənib

İstanbulda bir gəmidə karbon qazı sızması nəticəsində işçilər zəhərləniblər. İlkin məlumata əsasən, dörd nəfər xəstəxanaya yerləşdirilib.

NUHÇIXAN İnformasiya Agentliyi xəbər verir ki, hadisə İstanbulun Tuzla rayonunda gəmiqayırma zavodunun ərazisində dayanan bir gəmidə meydana gəlib.

Faktla bağlı İstanbul valiliyindən açıqlama verilib.

Bildirilib ki, hadisənin baş verməsi ilə bağlı bu gün saat 10:54-də məlumat daxil olub. Tuzlanın Aydıntəpə rayonundakı gəmiqayırma zavodunda təmir üçün dayanan Liberiya bayraqlı “Gulf Petrolyum-4” gəmisində çalışan işçilərin qazdan zəhərləndiyi bildirilib. Bölgəyə xilasedici və təcili tibbi yardım briqadaları cəlb olunub, lazımi işlər başladılıb. Alınan ilk məlumata görə, sızma təmir ediləcək borulardan birində meydana gəlib. Zəhərlənən işçilər xəstəxanaya yerləşdiriliblər.

Faktla bağlı araşdırma başladılıb.