BMT Təhlükəsizlik Şurasının yeni müvəqqəti üzvləri seçilib
BMT Baş Assambleyasında keçirilən səsvermənin nəticələrinə əsasən, beş ölkə - Ekvador, Yaponiya, Malta, Mozambik və İsveçrə Təhlükəsizlik Şurasının müvəqqəti üzvləri seçilib.
NUHÇIXAN İnformasiya Agentliyi xarici KİV-lərə istinadla xəbər verir ki, yeni seçilən üzvlər 2023-cü il yanvarın 1-dən etibarən fəaliyyətə başlayacaq. Onlar Təhlükəsizlik Şurasında Hindistan, İrlandiya, Keniya, Meksika və Norveçi əvəz edəcək.
Qeyd edək ki, BMT Təhlükəsizlik Şurası 15 ölkədən - beş daimi və Baş Assambleya tərəfindən iki il müddətinə seçilən on müvəqqəti üzvdən ibarətdir. Daimi üzvlərin - Böyük Britaniya, Çin, Rusiya, ABŞ və Fransanın “veto hüququ” var, yəni onlar qurumun müzakirəyə çıxarmaq istədiyi istənilən qərarı bloklaya bilər.
Təhlükəsizlik Şurasının müvəqqəti üzvü olmaq üçün Baş Assambleyanın ən azı üçdə ikisinin (128 dövlət) dəstəyini qazanmaq lazımdır. Quruma daimi və yeni seçilən üzvlərlə yanaşı, Albaniya, Braziliya, Qabon, Qana və Birləşmiş Ərəb Əmirlikləri də daxildir.