Dünyadakı qaçqın və məcburi köçkünlərin sayı İkinci Dünya müharibəsindən bəri ən yüksək həddə çatıb

Dünyada qaçqın və məcburi köçkünlərin sayı hazırda 100 milyon nəfərlik həddi aşıb və bununla da İkinci Dünya müharibəsindən bəri ən yüksək səviyyəyə çatıb.

NUHÇIXAN İnformasiya Agentliyi xəbər verir ki, BMT-nin Qaçqınlar üzrə Ali Komissarlığı (BMT QAK) bu məlumatı 20 İyun – Dünya Qaçqınlar Günü ərəfəsində yayıb. QAK-ın rəhbəri Filippo Qrandi bildirib ki, beynəlxalq ictimaiyyət münaqişələrin davamlı həllinə nail olmazsa, bu təhlükəli trend qarşıdakı dövrdə yüksələn xətlə davam edəcək.

Bildirilib ki, 1951-ci ildən, yəni BMT QAK təsis ediləndən bəri Ukraynada yaranmış böhran nəticəsində kütləvi qaçqın axını ən qısa zamanda yaranmış ən böyük qaçqın böhranıdır. Ukraynadakı vəziyyəti nəzərə alaraq, komissarlıq öz hesabatına təkcə ötən ili deyil, eyni zamanda dünyadakı aktual vəziyyəti də daxil edib.

Hesabatda qeyd edilib ki, 2021-ci ilin dekabr ayına olan məlumatlara əsasən, dünyada 89,3 milyon insan müharibə, güc tətbiqi, təqib və insan haqlarının pozulmasına görə qaçqınlıq həyatı yaşayır. Hazırda onların sayı 100 milyonluq həssas həddi aşıb. Bu göstərici 2020-ci ilin müvafiq dövrü ilə müqayisədə səkkiz faizdən çox artım deməkdir. Qaçqınların sayı ilbəil artmaqdadır və 2021-ci ildə onların sayı 2011-ci ilə nəzərən iki dəfə artıb.

Türkiyə, Kolumbiya, Uqanda, Pakistan və Almaniya dünyada ən çox qaçqın qəbul etmiş ölkələr siyahısında öndə durur.