Ukrayna və Rusiya həlak olmuş hərbçilərin meyitlərinin növbəti mübadiləsini aparıblar
Ukrayna və Rusiya Zaporojye vilayətində həlak olmuş hərbçilərin meyitlərinin növbəti mübadiləsini aparıblar. Ukraynanın 46 müdafiəçisinin cəsədləri qaytarılıb.
NUHÇIXAN İnformasiya Agentliyi bu barədə Ukraynanın Müvəqqəti İşğal edilmiş Ərazilərin Reinteqrasiyası Nazirliyinin mətbuat xidmətinə istinadla xəbər verir.
Məlumatda deyilir: “Zaporojye vilayətində həlak olmuş Ukraynalı hərbçilərin cəsədlərinin qaytarılması üzrə növbəti əməliyyat təşkil olundu. Ukrayna 46 qəhrəman müdafiəçinin meyitini layiqincə dəfn edilməsi üçün geri qaytardı. Onlardan 21-i “Azovstal”ın müdafiəçisi idi”.
Xatırladaq ki, Ukrayna ilə RF arasında meyitlərin bundan əvvəlki mübadiləsi iyunun 21-də həyata keçirilmişdi. Həmin mübadilədə Ukrayna tərəfinə 35 hərbçinin meyiti qaytarılmışdı.