İrəvanda partlayış nəticəsində itkin düşənlərin sayı 18 nəfərə çatıb
Ermənistanın Fövqəladə Hallar Nazirliyi bazar günü İrəvandakı “Surmalu” topdansatış ticarət mərkəzində baş vermiş partlayış nəticəsində itkin düşənlər haqqında məlumatı yeniləyib.
NUHÇIXAN İnformasiya Agentliyi xəbər verir ki, nazirliyin saytında yerləşdirilən məlumata görə, hazırda 18 nəfər itkin düşmüş sayılır. Onların arasında İran vətəndaşının da olduğu bildirilir.
Son məlumata görə, partlayış nəticəsində 6 nəfər ölüb, 61 nəfər yaralanıb. Yanğını yalnız bazar ertəsi günü səhərə yaxın lokallaşdırmaq mümkün olub. Dağıntılar altında hələ də sağ insanların qaldığı istisna olunmur. Hadisə yerində axtarış-xilasetmə əməliyyatları davam etdirilir. Ermənistan prokurorluğunun xüsusilə ağır cinayətlər üzrə istintaq idarəsi partlayışla bağlı cinayət işi başladıb.
Bu gün səhər hadisə yerinə gedən Baş nazir Nikol Paşinyan əraziyə baxış keçirib.