Avropa İttifaqının Bosniya və Herseqovinadakı sülhməramlı missiyasının səlahiyyət müddəti uzadılıb
Avropa İttifaqının (Aİ) Bosniya və Herseqovinadakı sülhməramlı missiyasının (EUFOR “Althea”) səlahiyyət müddəti yenə uzadılıb.
NUHÇIXAN İnformasiya Agentliyi xəbər verir ki, bu barədə Nyu-Yorkda keçirilən BMT Təhlükəsizlik Şurasının sessiyasında qərar qəbul olunub. Sessiyada EUFOR “Althea”nın Bosniya və Herseqovinada sülhün və sabitliyin qorunmasında mühüm rol oynadığı, missiyanın mandatının uzadılmasının zəruriliyi vurğulanıb.
BMT Təhlükəsizlik Şurasının 15 üzvü Bosniya və Herseqovinada sülhün və sabitliyin qoruması məqsədilə EUFOR-un mandatının uzadılmasının lehinə səs verib.
Bosniya və Herseqovinada sülhü və sabitliyi təhdid edən təhlükələrin müzakirə edildiyi sessiyada çıxış edən İrlandiyanın BMT-dəki daimi nümayəndəsi Ferqal Mythen EUFOR-un bu ölkədə olmasını dəstəklədiklərini bildirib.