G7 ölkələri Ukraynaya dəstək vədlərini bir daha təsdiqləyiblər

ABŞ, Kanada, Almaniya, İngiltərə, Fransa, İtaliya və Yaponiyadan ibarət G7 ölkələri yaydıqları birgə bəyanatla Ukraynaya dəstək vədlərini bir daha təsdiqləyiblər.

NUHÇIXAN İnformasiya Agentliyi xarici KİV-lərə istinadla bildirir ki, Almaniyanın hazırda sədri olduğu “Böyük yeddilik” ölkələrinin liderlərinin onlayn görüşündə qəbul edilən birgə bəyanatda bu barədə deyilir: “Biz Ukraynaya sarsılmaz dəstəyimizi bir daha təsdiqləyirik və Rusiyanın davam edən müharibəsinə qarşı Ukrayna ilə həmrəy olduğumuzu bildiririk”.

Sənəddə Rusiyanın Ukraynadakı kritik infrastrukturlara qeyri-insani və qəddar hücumları pislənilib və onun mülki şəxslərə qarşı hərəkətlərinin müharibə cinayətləri olduğu xatırladılıb. G7 ölkələri, həmçinin Rusiyadan müharibəni dərhal dayandırmağı, ordusunu Ukrayna ərazisindən tamamilə və qeyd-şərtsiz çıxarmasını tələb ediblər.

Bəyanatda “Taxıl dəhlizi” sazişinin müddətinin uzadılmasından məmnunluq ifadə olunub.