Gürcüstan hökuməti futbol üzrə Avropa çempionatına hazırlıq məqsədilə idman infrastrukturuna 32 milyon dollardan çox vəsait ayırıb

Gürcüstan bu il 21 yaşadək futbolçular arasında Avropa çempionatının final mərhələsinə ev sahibliyi edəcək.

NUHÇIXAN İnformasiya Agentliyi xəbər verir ki, Gürcüstan hökuməti ölkədə idman infrastrukturunun yaxşılaşdırılması üçün konkret addımlar atacaq. Hökumət bu məqsədlə 32 milyon ABŞ dollarından çox vəsait ayırıb.

Gürcüstan hökumətinin mətbuat xidmətindən bildirilib ki, turnirin yüksək səviyyədə keçirilməsi üçün Tbilisi, Saquramo, Kutaisi, Tsxaltubo, Kobuleti və Batumidə stadionlar, məşq meydançaları da daxil olmaqla, 12 idman obyektində bu il təmir-tikinti işləri aparılacaq.

Qeyd edək ki, Avropa çempionatı bu il iyunun 21-dən iyulun 8-dək Gürcüstan və Rumıniyada təşkil olunacaq. 16 komandanın iştirak edəcəyi turnirdə ümumilikdə 8 stadiondan istifadə olunacaq.

Çempionatın açılış oyunu Rumıniyada keçiriləcək.

Turnir çərçivəsində Gürcüstanda 16 qarşılaşma olacaq. Qrup və 1/4 final oyunları Tbilisi, Kutaisi və Batumidə keçiriləcək. Final matçına Batumi Adjarabet Arena ev sahibliyi edəcək.