Misirdə arxeoloqlar gülən sfinks heykəli və türbə qalıqları aşkar ediblər

Misirin Ayn Şəms Universitetinin arxeoloji missiyasının bir vaxtlar Horus məbədinin yerləşdiyi Qena ərazisindəki Dendara məbədinin şərq tərəfində apardığı qazıntı zamanı Roma imperatorunun gülən sfinks heykəli və türbə qalıqları aşkar edilib.

NUHÇIXAN İnformasiya Agentliyi “Əl Əhram” qəzetinə istinadla xəbər verir ki, Misirin keçmiş turizm və antik abidələr naziri, Ayn Şəms Universitetinin professoru Məmduh Əl-Damati türbənin əhəngdaşı ilə tikildiyini, onun təməlləri və enişi olan iki səviyyəli platformadan ibarət olduğunu bildirib. O əlavə edib ki, qazıntı aparılan ərazidə nərdivanı suvaqla örtülmüş və çiy kərpicdən olan Bizans hövzəsi tapılıb. Təmizlik zamanı hövzədə əhəngdaşı ilə oyulmuş gülən sfinks də aşkar edilib.

Misirli professor deyib: “Bu, gözəl və dəqiq həkk olunmuş sfinks heykəlidir. Onun gülər siması və digər əlamətləri kral üz xüsusiyyətlərinə malik olduğunu göstərir. Heykəlin başına kobra formalı karbamidlər olan rəmzlər taxılıb. Sfinksin ilkin tədqiqi onun Roma imperatoru Klavdiyə aid ola biləcəyini göstərir”.

Tapılan sfinks heykəlinin altından demotik və heroqliflə yazılmış Roma stelasının da tapıldığı bildirilib. Heykəlin dəqiq kimliyini və ya ərazinin sirlərini üzə çıxara biləcək stelaların oxunması üçün araşdırmalar aparılacaq.

Ötən ilin noyabrında qazıntı işlərinə başlayan Misirin arxeoloji missiyası Horus məbədi bloklarının daha çox hissəsinin üzə çıxarılması üçün bölgədəki işləri davam etdirəcək.