NATO Türkiyəyə 4 min nəfərlik çadır göndərəcək - VİDEO

NATO Türkiyəyə 4 min nəfərlik çadır göndərəcək.

NUHÇIXAN İnformasiya Agentliyi Türkiyənin Milli Müdafiə Nazirliyinə istinadən xəbər verir ki, bu barədə ölkənin milli müdafiə naziri ordu generalı Hulusi Akar deyib.

Onun sözlərinə görə, Alyansla bu barədə razılıq əldə olunub.

Qeyd olunub ki, NATO Hatayda 4 min nəfərlik çadır şəhərciyinin qurulmasında iştirak edir: “Bundan əlavə olaraq, daha 4 min nəfərlik çadır da ölkəmizə göndəriləcək”.

Xatırladaq ki, fevralın 6-da ocağı Türkiyənin Kahramanmaraş şəhərinin Pazarcık rayonunda olan 7,7 maqnitudalı və 9 saat sonra episentri eyni şəhərin Elbistan rayonu olan 7,6 maqnitudalı iki zəlzələ olub.

Güclü yeraltı təkanlardan sonra bölgədə 6,6 maqnitudayadək 10 000-dən çox afterşok qeydə alınıb. İki zəlzələ həmçinin Livan, Kipr, İraq, İsrail, İordaniya, İran və Misirdə hiss edilib.

Təbii fəlakət Türkiyə və Suriyada böyük dağıntı və onminlərlə itkiyə səbəb olub. Türkiyənin zəlzələ baş verən 10 şəhərində 3 aylıq fövqəladə vəziyyət elan olunub.

Bu hadisə Türkiyədə 1939-cu ildən bəri qeydə alınan ən güclü zəlzələ kimi tarixə düşüb. Zəlzələdən dərhal sonra Azərbaycanda qardaş ölkə üçün yardım toplanmasına başlanılıb.

Hadisə nəticəsində həlak olanların sayı 46 mini keçib.