Pakistanda ekstremistlərin hücumu zamanı dörd polis həlak olub
Pakistanda ekstremistlərin Hayber-Paxtunxva əyalətindəki nəzarət-buraxılış məntəqələrinin birinə hücumu nəticəsində azı dörd polis əməkdaşı həlak olub, altı nəfər yaralanıb.
NUHÇIXAN İnformasiya Agentliyi “The News” nəşrinə istinadla xəbər verir ki, hadisə bu gün səhər saatlarında baş verib. Hücumun qarşısını almaq üçün köməyə göndərilən dörd polis əməkdaşı ekstremistlərin yolda yerləşdirdikləri partlayıcı qurğunun işə düşməsi nəticəsində həyatını itirib.
Hücum dəf edilib. Hüquq-mühafizə orqanlarının əməkdaşları hadisə yerində əməliyyat-axtarış tədbirlərinə başlayıb.
Pakistanda qadağan edilmiş “Təhrik-e-Taliban” qruplaşması 2022-ci ilin iyununda hökumətlə bağladığı atəşkəs sazişindən çıxdığını elan etdikdən sonra Hayber-Paxtunxva əyalətində vəziyyət gərginləşib.