Okeanın 8336 metr dərinliyində yeni balıq növü aşkarlanıb

Elm adamları bu günlərdə 8 kilometrdən çox dərinlikdə üzən balığı lentə alaraq, ən dərində yaşayan balıqlar barədə yeni rekorda imza atıblar.

NUHÇIXAN İnformasiya Agentliyi xarici KİV-lərə istinadla xəbər verir ki, Yaponiya sahillərində, İzu-Oqasavara çökəkliyinin yaxınlığında 8336 metr dərinlikdə üzən Pseudoliparis cinsinin naməlum növü alimlər tərəfindən indiyə qədər görülmüş, okeanın ən dərinliyində yaşayan balıq növüdür.

Bəs heyvanlar okeanlarımızın qaranlıq dərinliklərində sağ qalmağa necə uyğunlaşırlar?

Okeanın dərinliklərinə birbaşa günəş işığı düşmür və buna görə də canlılar günəş enerjisini şəkərə çevirmək üçün fotosintezə etibar edə bilməzlər. Bunun əvəzinə onlar okean dibindəki hidrotermal dəliklər ətrafında baş verən kimyəvi reaksiyalardan çıxan enerjidən istifadə edərək şəkər yaratmaq üçün kemosintezdən istifadə edirlər. Onlar dəniz dibindən çıxan kimyəvi maddələr hesabına yaşayırlar. Dərinlikdəki dəniz balıqları da aşağı oksigenli mühitdə yaşamaq üçün uyğunlaşırlar. Bütün bu uyğunlaşmalar canlılara okeanın dərinliklərindəki qaranlıq uçurumda, planetimizin ən sərt mühitlərindən birində inkişaf etməyə imkan verir.

Qeyd edək ki, indiyədək kameraya düşən ən dərin balıq rekordu 2014-cü ildə Mariana çökəkliyində təxminən 8200 metr dərinlikdə aşkar edilən Mariana ilbiz balığı növünə (Pseudoliparis swirei) məxsusdur.