Ukrayna ordusu son sutkada Rusiyanın 7 "Şahed" PUA-sını məhv edib

Ukrayna ordusu son sutkada Rusiyanın İran istehsalı olan 7 “Şahed” pilotsuz uçuş aparatını (PUA) məhv edib.

NUHÇIXAN İnformasiya Agentliyi xəbər verir ki, bu barədə Ukrayna Silahlı Qüvvələrinin Baş Qərargahı məlumat yayıb.

Cəbhədəki son vəziyyəti açıqlayan qurumdan bildirilib ki, həmçinin Rusiyanın 2 “Orlan-10”, “Supercam” kəşfiyyat və 1 “Lanset” hücum PUA-sı vurulub.

Ukrayna Silahlı Qüvvələrinin raket qoşunları və artilleriya bölmələri Rusiyanın canlı qüvvəsinin cəmləşdiyi 3 rayona, radioelektron döyüş stansiyasına və daha bir mühüm hərbi obyektinə zərbələr endirib: “Son sutka ərzində Rusiya Silahlı Qüvvələri Ukrayna ərazisinə ümumilikdə 58 raket zərbəsi endirib, dinc sakinlər arasında yaralananlar var. Ukraynanın bütün ərazisi boyunca növbəti raket hücumları ehtimalı yüksək olaraq qalır”.

Məlumata görə, son sutkada Ukrayna Müdafiə Qüvvələri düşmənin 60-dan çox hücumunu dəf edib: “Ən şiddətli döyüşlər Baxmut və Maryinka uğrunda gedir”.

Qeyd edək ki, Rusiya ilə Ukrayna arasındakı genişmiqyaslı müharibə ötən il fevralın 24-də başlayıb.