Kosovoda toqquşmalarda xəsarət alanların sayı 75 nəfərə çatıb

Kosovonun şimalında serblərlə toqquşmalarda xəsarət alanların sayı 75 nəfərə çatıb.

Bu barədə NUHÇIXAN xarici mətbuata istinadən xəbər verir.

Şimali Mitrovitsa Xəstəxanasının baş həkimi Zlatan Elek qarşıdurmalarda 50 nəfərin yaralandığını bildirib. O, qeyd edib ki, yaralılardan 3-ü xəstəxanada müalicə olunur, onlardan 1-nin vəziyyəti ağırdır.

Daha əvvəl NATO-nun beynəlxalq missiyasının komandiri Ancelo Mişel Ristuçça macar və italyan əsgərlərin hücumların hədəfinə çevrildiyini və 25-ə yaxın əsgərin xəsarət aldığını bildirib.

İtaliyanın xarici işlər naziri Antonio Tajani qarşıdurmalarda missiyada vəzifəsini yerinə yetirən 11 italyan əsgərinin yaralandığını açıqlayıb və onlardan 3-nün vəziyyətinin ağır olduğunu, lakin həyati təhlükənin olmadığını bildirib.

Qeyd edək ki, mayın 26-da Kosovonun şimalındakı bələdiyyələrdə serblərlə polis arasında gərginlik yaranıb.