Nüvə silahına malik dövlətlər öz arsenallarını genişləndirir

Nüvə silahına malik dövlətlər dünyada müşahidə olunan geosiyasi gərginlik fonunda öz arsenallarını genişləndirir.

NUHÇIXAN xəbər verir ki, bu barədə məlumat Stokholm Beynəlxalq Sülh Araşdırmaları İnstitutunun (SIPRI) yeni hesabatında yer alıb.

2023-cü ilin yanvar ayına olan məlumata görə, nüvə texnologiyalarına malik ölkələr ümumilikdə 12 512 nüvə başlığına sahibdir. Döyüş başlıqlarının 9576-sı potensial istifadə üçün hərbi ehtiyatlarda saxlanılır. Onların təxminən iki minə qədəri Rusiya və ABŞ arsenalında daimi döyüş hazırlığı vəziyyətindədir.

Birləşmiş Ştatlar nüvə ölkələri arasında 1770 döyüş başlığı ilə liderliyini davam etdirir. İkinci yerdə 1674 döyüş başlığı ilə Rusiya, üçüncü və dördüncü yerlərdə Fransa (280 döyüş başlığı) və Böyük Britaniya (120 döyüş başlığı)  qərarlaşıb.

Öz növbəsində Çin nüvə silahı həcmlərində əhəmiyyətli artım göstərir - 2022-ci ildə arsenal 350-dən 410 döyüş başlığına qədər artıb və bu sayın çoxalması gözlənilir. Oxşar planları İngiltərə, Pakistan və Hindistan da açıqlayıb.

Xatırladaq ki, nüvə ölkələri sırasına Rusiya, ABŞ, Böyük Britaniya, Fransa, Çin, Hindistan, Pakistan, Şimali Koreya və İsrail daxildir.