Yunanıstanda meşə yanğınları törətməkdə şübhəli bilinən dörd nəfər saxlanılıb
Yeddi gündür yanğınların davam etdiyi Yunanıstanda ötən gün ərzində 9 yanğın cəhdi aşkarlanıb.
NUHÇIXAN xəbər verir ki, bu barədə Yunanıstanın İqlim böhranı və mülki müdafiə naziri Vasilis Kikilias bildirib.
O, açıqlamasında ölkənin müxtəlif bölgələrində günlərdir davam edən yanğınlara qarşı total mübarizə aparıldığını qeyd edərək, güclü külək səbəbindən bəzi yanğınların nəzarətdən çıxdığına diqqət çəkib.
Nazir qeyd edib ki, səhər saat 08:00-a qədər paytaxt Afinanın təxminən 50 kilometr şimalındakı Parnita dağının meşə sahəsində və Afinanın təxminən 60 kilometr şimalındakı Avlona bölgəsində 9 yanğın cəhdi aşkarlanıb.
Şübhəlilərin nəzarətə alındığını bildirən V.Kikilias söyləyib ki, yanğını törətməkdə şübhəli bilinən 4 nəfər saxlanılıb.
Saxlanılanlardan birinin üzərində axtarış zamanı düşərgəçilərin təbiətdə od yandırmaq üçün istifadə etdikləri pambıq, durbin və maqnezium çubuqları aşkar edilib. Şübhəlilərdən ikisinin üzərində alışqan və içərisində alışan maddə olan butulka tapılıb.
Meşə sahələrində yanğın törətdiyi aşkarlanan 45 yaşlı kişi də saxlanılıb.