Siciliya adasında meşə yanğınları yaşayış məntəqələrinə yaxınlaşıb

İtaliyanın cənubundakı Siciliya adasının Messina şəhəri yaxınlığında meşə yanğınları baş verib.

NUHÇIXAN xəbər verir ki, yanğınların bəzi yerlərdə yaşayış məntəqələrinə yaxınlaşdığı, insanların evlərini tərk etmək məcburiyyətində qaldığı və təsərrüfata ziyan dəydiyi bildirilir. Bəzi bələdiyyələrdə məktəblərin, uşaq bağçalarının və sosial strukturların bağlanması barədə göstəriş verilib.

Adanın Palermo, Trapani, Kataniya şəhərlərində qırmızı, digər bölgələr üçün narıncı xəbərdarlıq elan olunub. Yanğınsöndürənlər, meşə təsərrüfatının əməkdaşları və mülki müdafiə könüllüləri gücləndirilmiş iş rejiminə keçib. Əhaliyə maksimum sayıqlıq göstərmək, şübhəli hərəkətlər barədə məlumat vermək, alaq otlarını yandırmamaq barədə xəbərdarlıq edilib.

İtaliyanın şimal və mərkəzi regionlarında yağmurlu hava şəraiti davam etsə də, Siciliya adasında temperaturun bu gün 35 dərəcəni keçəcəyi gözlənilir. Hazırda adada, həmçinin küləkli hava şəraiti hökm sürür.