Yapon həkimlər endoskopik əməliyyat zamanı 8K texnologiyasından istifadə ediblər
Yaponiyanın şimalında yerləşən Hokkaydo xəstəxanasında endoskopik əməliyyat zamanı çox yüksək həllə malik 8K texnologiyasından istifadə edilib.
NUHÇIXAN NHK telekanalına istinadla xəbər verir ki, Asahikava Universitetinin xəstəxanasında aparılan əməliyyat zamanı 8K formatlı kameraya malik endoskopdan istifadə edilib. Bu zaman alınan görüntülərin yüksək dəqiqliyə malik ənənəvi görüntülərdən 16 dəfə daha keyfiyyətli olduğu bildirilir.
Yeni texnologiyadan düz bağırsağında xərçəng olan xəstənin əməliyyatı zamanı istifadə edilib.
Əməliyyatı aparan cərrahlardan birinin sözlərinə görə, yeni texnologiyaların tətbiqi endoskopik əməliyyatlar zamanı təhlükəsiz və daha dəqiq fəaliyyətə şərait yaradacaq.