NDU-da genişmiqyaslı Beynəlxalq Təlim Aylığı proqramına start verilib - FOTOLAR
NUHÇIXAN-ın məlumatına görə, Naxçıvan Dövlət Universitetində genişmiqyaslı Beynəlxalq Təlim Aylığı proqramının açılış tədbiri keçirilib. Tədbirdə Naxçıvan Dövlət Universitetinin rektoru Elbrus İsayev, universitetin rəhbər heyəti, Tibb fakültəsinin müəllim və tələbələri, eyni zamanda Acıbadem Xəstəxanasının Ürək-Damar klinikasının qurucusu, professor Cem Alhan iştirak ediblər.
Universitetin Strateji məsələlər üzrə rektor müşaviri Rəcəb Cəfərli proqram haqqında məlumat verib. Bildirib ki, proqram çərçivəsində 6 fərqli ölkədən 21 təlimçi universitetdə təlimlər aparacaq.
Təlimlər ABŞ, Yaponiya, İngiltərə, Türkiyə, Hollandiya və Özbəkistandan olan tanınmış ekspertlər tərəfindən keçiriləcək. BMT-nin Dayanıqlı İnkişaf Məqsədlərinə uyğun olaraq təhsil, elm, beynəlmiləlləşmə, resurslar, dayanıqlılıq olmaqla 5 əsas sahə üzrə 21 mövzuda təşkil olunacaq təlimlər 3 dildə- Azərbaycan, türk və ingilis dillərində olacaq.
Tədbiri açıq elan edən Naxçıvan Dövlət Universitetinin rektoru Elbrus İsayev vurğulayıb ki, bu il aprel ayı Naxçıvan Dövlət Universitetində öncədən elan olunmuş Beynəlxalq Təlimlər aylığıdır. Dünyanın fərqli ölkələrinin universitetlərindən, elmi tədqiqat institutlarından Naxçıvana dəvət olunan ixtisaslı mütəxəssislər tərəfindən sertifikatlı təlimlər veriləcək. Bu proqram iştirakçılara qlobal bilik və təcrübə mübadiləsi imkanı yaradacaq. Hər təlim müasir metodlar əsasında təşkil olunacaq və interaktiv müzakirələr, praktiki çalışmalar və qrup işləri ilə zənginləşdiriləcək. Rektor diqqətə çatdırıb ki, əcnəbi müəllimlərin təlimlərinin təşkili hər zaman diqqətdə olub ancaq bu dəfə belə genişmiqyaslı beynəlxalq təlimlər aylıq çərçivəsində həm ölkə universitetləri arasında, həm də Naxçıvan Dövlət Universitetində ilk dəfədir təşkil olunur. Elbrus İsayev əlavə edib ki, bu tədbir universitetin ümumi inkişaf strategiyası planının tərkib hissəsidir və bütün sahələrdə innovativ yenilikləri universitetə gətirməkdə maraqlıyıq.
Türkiyənin Acıbadem Xəstəxanasının Ürək-Damar klinikasının qurucusu, professor Cem Alhan çıxış edərək tədbir iştirakçılarını salamlayıb və dəvət üçün təşəkkürünü bildirib. Professor təhsil və fəaliyyət dövrü haqqında məlumatları diqqətə çatdırıb. Qeyd edib ki, Robotik ürək cərrahiyəsi əməliyyatlarında dünya əhəmiyyətli ilklərə imza atıb. Türkiyədə ilk dəfə robotik üsulla ürək qapağı dəyişdirmə əməliyyatını edib. Həmçinin dünya tibb tarixində robotik üsulla ürəkdə eyni anda beş fərqli əməliyyat edib. Bu günə qədər 15 mindən artıq uğurlu ürək əməliyyatı aparıb və Bypass əməliyyatlarında 99%-lik uğur qazanıb. Professor Naxçıvanda ilk dəfə olması ilə bağlı təəssüratlarını bölüşüb və Robotik cərrahiyə haqqında ətraflı məlumat verib.
Qeyd edək ki, proqram 1-30 aprel tarixlərini əhatə edir. Ay ərzində Beynəlxalq sertifikatlı təlim keçirmək hüququna malik mütəxəssislər tərəfindən sertifikatlı təlimlər veriləcək. Həmçinin muxtar respublikada fəaliyyət göstərən bütün qurumların nümayəndələri də ödənişsiz olaraq təlimlərdə iştirak edə biləcəklər.
Kifayət Mahmudova
Media və ictimaiyyətlə əlaqələr şöbəsinin müdiri