Füzulişünaslığa dəyərli töhfə
AMEA-nın Nəsimi adına Dilçilik İnstitutunun Azərbaycan dilinin tarixi şöbəsinin böyük elmi işçisi, filologiya üzrə fəlsəfə doktoru Aynurə Mahmudovanın “Füzuli ədəbi məktəbi (XVI-XVIII əsrlər)” monoqrafiyası nəşr edilib.
AMEA-dan NUHÇIXAN-a bildirilib ki, monoqrafiya Nizami Gəncəvi adına Ədəbiyyat İnstitutunun füzulişünaslıq sektorunun hazırladığı “Füzuli kitabxanası” seriyasının II nəşridir. Kitabın elmi məsləhətçisi və “Ön söz”ün müəllifi AMEA-nın Humanitar Elmlər Bölməsinin akademik-katibi, akademik Teymur Kərimli, elmi redaktoru filologiya üzrə elmlər doktoru Ataəmi Mirzəyev, rəyçiləri isə filologiya üzrə fəlsəfə doktoru, dosent Əzizağa Nəcəfov və filologiya üzrə fəlsəfə doktoru, dosent Sevinc Əliyevadır.
Kitabda Azərbaycan ədəbiyyatı tarixində xüsusi yeri olan Füzuli ədəbi məktəbi ilk dəfə olaraq bütün yönləri ilə vəhdət şəklində tədqiqata cəlb edilib. Monoqrafiyada Füzuli ədəbi məktəbinin təşəkkülü və inkişaf yolları araşdırılıb, ədəbiyyat tarixində bu məktəbin mövqeyi, nüfuzu müəyyənləşdirilib. Bu ədəbi məktəbin nümayəndəsi olan şairlərin ədəbiyyat tarixində oynadığı rol, Füzuli yaradıcılığının ədəbi məktəbin nümayəndələrinin yaradıcılığına təsiri nümunələr əsasında araşdırılıb.
Monoqrafiyada ədəbiyyatşünaslıqda “ədəbi məktəb” anlayışının məzmunu ilə bağlı dəqiqləşdirmələr aparılıb, Nizami ədəbi məktəbi işığında Şərq ədəbiyyatında ədəbi məktəblərin yaranma və yaşama prinsipləri, xüsusiyyətləri göstərilib, Füzuli ədəbi məktəbinin tarixi ümumi şəkildə nəzərdən keçirilib. Bundan başqa, XVI əsrdən başlayaraq Füzuli ədəbi məktəbinin ədəbiyyat tarixindəki mövqeyi, təşəkkül və inkişaf xüsusiyyətləri, onun ayrı-ayrı şairlərə, eləcə də başqa xalqların ədəbiyyatına təsiri müəyyənləşdirilib. Həmçinin XVI-XVIII əsrlər Füzuli ədəbi məktəbi nümayəndələrinin Füzulinin təsiri ilə yaranan əsərləri öyrənilib və təhlil edilib.
Əsər tələbələr, ali məktəb müəllimləri, magistrant, dissertant və doktorantlar, eləcə də geniş oxucu kütləsi üçün nəzərdə tutulub.