Akademik İsa Həbibbəyli Hindistanın Cəvahirləl Nehru Universitetində elmi ezamiyyətdə olub - FOTOLAR
Azərbaycan Milli Elmlər Akademiyasının vitse-prezidenti, Nizami Gəncəvi adına Ədəbiyyat İnstitutunun direktoru, akademik İsa Həbibbəyli Hindistanın Cəvahirləl Nehru Universitetinin dəvəti ilə bu ölkədə səfərdə olub.
İnstitutdan NUHÇIXAN-a bildirilib ki, Cəvahirləl Nehru Universitetinin vitse-kansleri, professor M.Caqadeş ilə görüş zamanı bu elmi-tədqiqat və ali təhsil qurumu ilə Nizami Gəncəvi adına Ədəbiyyat İnstitutu arasında qarşılıqlı əlaqələrə dair əməkdaşlıq müqaviləsi imzalanıb. Müqavilədə Cəvahirləl Nehru Universitetində azərbaycanşünaslıq, Ədəbiyyat İnstitutunda isə hindistanşünaslıq mərkəzlərinin yaradılması, eləcə də Cəvahirləl Nehru Universitetində yeni açılmış türk dili və ədəbiyyatı ixtisasında “Azərbaycan dili və ədəbiyyatı” fənninin proqrama daxil edilməsi və tədrisi, birgə elmi konfransların keçirilməsi, elmi jurnalların mübadiləsi və sair məsələlər nəzərdə tutulur. Cəvahirləl Nehru Universitetinin rektoru, professor Çintamani Mahapata və Beynəlxalq Münasibətlər İnstitutunun baş direktoru, professor Çita Bamezai ilə görüşlərdə isə ikitərəfli elmi əməkdaşlığın həyata keçirilməsi haqqında müzakirələr aparılıb.
Akademik İsa Həbibbəyli Cəvahirləl Nehru Universitetinin Beynəlxalq Əlaqələr İnstitutunda “Azərbaycan-Hindistan ədəbi-mədəni əlaqələri” mövzusunda mühazirə oxuyub. O, eyni zamanda, türk dili və ədəbiyyatı ixtisasının professor-müəllim heyəti və tələbə kollektivi qarşısında “Azərbaycan ədəbiyyatının inkişaf mərhələləri və əsas yaradıcıları” mövzusunda dərs keçib. Cəvahirləl Nehru Universitetində təşkil olunmuş Novruz konfransında da İsa Həbibbəylinin çıxışı maraqla qarşılanıb.
Cəvahirləl Nehru Universitetinin vitse-kansleri, professor M.Caqadeş Nizami Gəncəvi adına Ədəbiyyat İnstitutuna dəvət olunub.
Hindistan Mədəniyyət Fondunun əməkdaşı Doqra və Cəvahirləl Nehru Universitetinin türk dili və ədəbiyyatı kafedrasının müdiri, professor Gous Mashkoor Khan səfərin təşkilində yaxından iştirak ediblər.
Səfər çərçivəsində İsa Həbibbəyli görkəmli Azərbaycan şairi Nizami Gəncəvinin Hindistanda ən böyük davamçısı, hind ədəbiyyatının klassiki Əmir Xosrov Dəhləvinin məzarını və məşhur Tac-Mahal məbədgahı kompleksini ziyarət edib.