ABŞ və Çin alimləri möhkəm və sürətli “robot-tarakan” hazırlayıblar

ABŞ və Çin alimləri yumşaq materialdan möhkəm və sürətlə hərəkət edən kiçik robot hazırlayıblar. NUHÇIXAN Sinxua agentliyinə istinadla xəbər verir ki, bu miniatür robot tarakanın fiziki xarakteristikaları əsasında düzəldilib.

“Robot-tarakan”ı ABŞ-ın Kaliforniyadakı Berkli, Çinin Sinxua (Pekin) və Pekin Aerokosmik universitetlərinin alimləri birgə hazırlayıblar. Onun uzunluğu cəmi 1,5 santimetr, eni isə 1 santimetrdir. Çox cəld hərəkət edən bu robot saniyədə 30 santimetr məsafə qət edir. Layihənin müəlliflərindən biri Çjan Min bildirib ki, robot kağız səhifəsinə bənzəyir və yükqaldırma, yoxuşa qalxma qabiliyyətinə malikdir. Onun üzərinə 60 kiloqram çəkisi olan insan da çıxa bilər.

Bu yumşaq, eyni zamanda, bərk robotun əvvəlki sələflərindən başlıca fərqi onun hazırlanmasında istifadə olunan material və texnologiyalardır. Alimlər bildirirlər ki, çox yumşaq olan robot cəld hərəkət edə bilmir, çox bərk olduqda isə möhkəmliyini itirir. Bu parametrləri nəzərə alan tədqiqatçılar “qızıl orta”nı tapa biliblər. Belə ki, yumşaq struktura malik olan robot unikal texnologiyaların sayəsində həm möhkəm, həm də sürətli mexaniki tarakana çevrilib.

Layihənin müəllifləri qeyd ediblər ki, bu robotlardan qəza-xilasetmə işlərində, boru kəmərlərinin tikintisində, ətraf mühitin monitorinqində, klinik əməliyyatda istifadə etmək olar. Məsələn, “robot-tarakan” mühəndislərə aviasiya motorlarını sökmədən təmir etməkdə kömək edə bilər. Lakin, onların fikrincə, geniş sahələrdə istifadəsindən əvvəl robotun konstruksiyası daha da təkmilləşdirilməlidir.