Kolleclərin boş qalan plan yerlərinə ixtisas seçimi aparılır: 257 nəfər ərizəsini təsdiqləyib

Bu gündən 2019/2020-ci tədris ili üçün Azərbaycan Respublikasının tam (11 illik) orta təhsil bazasında orta ixtisas təhsili müəssisələrinin (kolleclərin) boş qalan plan yerlərinə ixtisas seçimi aparılır.

NUHÇIXAN Dövlət İmtahan Mərkəzinin saytına istinadla xəbər verir ki, saat 11:25-ə olan göstəricilərə görə, boş qalan yerlərə qəbul olunmaq üçün 257 nəfər ixtisas seçimi ərizəsini təsdiq edib.

Orta ixtisas təhsili müəssisələrinin boş qalan yerlərinə tələbə qəbulu müsabiqəsində iştirak etmək üçün ixtisas seçiminə qəbul imtahanında topladıqları ümumi balı 50-dən, Azərbaycan dili (rus dili) və riyaziyyat fənlərinin hər biri üzrə balı 10-dan az olmayan (xarici dil fənni üzrə bal məhdudiyyəti tətbiq edilmir) abituriyentlər buraxılır. Tam orta təhsil səviyyəsini Azərbaycan Respublikasının ümumi təhsil müəssisələrində cari ildə bitirən abituriyentlər müsabiqədə buraxılış imtahanında (11-ci siniflər üzrə) əldə etdikləri nəticələr əsasında iştirak edirlər.

İxtisas seçimi sentyabrın 4-dək internet vasitəsilə aparılır.

Kolleclərin boş qalan plan yerlərinin siyahısı “Abituriyent” jurnalının 11-ci nömrəsində dərc olunub.