“Azərbaycan satirik mətbuatında gizli imzalar (1906-1920)” kitabı çap olunub
Azərbaycan Milli Elmlər Akademiyasının Məhəmməd Füzuli adına Əlyazmalar İnstitutunun şəxsi arxivlərin tədqiqi şöbəsinin aparıcı elmi işçisi, filologiya üzrə fəlsəfə doktoru, dosent Afaq Əliyevanın və Nizami adına Ədəbiyyat İnstitutunun aparıcı elmi işçisi, filologiya üzrə fəlsəfə doktoru, dosent Elmira Qasımovanın birgə tərtibçiliyi ilə “Azərbaycan satirik mətbuatında gizli imzalar (1906-1920)” biblioqrafik göstərici kitabı nəşr olunub.
Əlyazmalar İnstitutundan NUHÇIXAN-a bildiriblər ki, kitabda 1906-1920-ci illərdə nəşr olunan 13 satirik jurnalın səhifələrindəki gizli imzalar qeydə alınıb, onların işlənmə mənbələri göstərilib. Kitab naməlum və gizli imzalarla çıxış edən Azərbaycan müəlliflərinin ədəbi irsinin müəyyən edilməsi və toplanılması istiqamətində tədqiqatçıların istinad edəcəkləri mənbə kimi yararlıdır.