Naxçıvan Müəllimlər İnstitutunda bu ildən xarici tələbələr də təhsil alır

NUHÇIXAN xəbər verir ki, 5 oktyabr-Beynəlxalq Müəllimlər Günü münasibətilə Naxçıvan Müəllimlər İnstitutunda tədbir keçirilib.

Tədbirdə İnstitutun rektoru Elbrus İsayev bildirib ki, Naxçıvan Müəllimlər İnstitutun binası ötən il yenidən qurulub. Təhsil ocağında lazımi tədris şəraiti yaradılıb, maddi-texniki bazası gücləndirilib. 21 tələbə ilə fəaliyyətə başlayan institutda hazırda 1300-dən artıq tələbə bakalavr səviyyəsində, 60-a yaxın tələbə isə magistr səviyyəsində  təhsil alır. Bu ildən etibarən  institutda 3 yeni  ixtisas üzrə tələbə qəbuluna  başlanılıb. Psixologiya, İngilis dili və Tarix müəllimliyi üzrə ixtisaslar açılıb. Yeni açılan ixtisaslarda yerli tələbələrlə yanaşı xaricdən gələn tələbələr də  təhsil alır.

Bu il Naxçıvan Müəllimlər İnstitutuna yüksək balla qəbul olan tələbələrin sayı 37 nəfərdən 68 nəfərə qalxıb.  Ali təhsil müəssisəsində  çalışan 101 müəllimdən 6-sı elmlər doktoru, 4-ü professor, 42-si fəlsəfə doktoru, 36-sı dosentdir.

Rektor 5 oktyabr-Beynəlxalq Müəllimlər Günü münasibətilə Naxçıvan Müəllimlər İnstitutunda çalışan pedaqoqların  timsalında bütün müəllimləri təbrik edib, onlara  şərəfli işlərində uğurlar arzulayıb.

Professor Akif İmanlı və gənc müəllim Ayşən Seyidova ölkəmizdə, o cümlədən muxtar respublikamızda müəllim əməyinə verilən dəyərdən danışıblar.   

Sonda tələbələrin ifasında musiqi nömrələri səsləndirilib, kompozisiya nümayiş olunub.

                                                                  Əbülfəz Dünyamalıyev